理大工程師撞擊點理論助翻案

7月的時候和大家分享過理工大學機械工程學系工程師盧覺強引用物理定律打官司,助小路車禍司機脫罪。9月盧覺強工程師亦於庭上做撞車實驗 牛頓第三定律助司機脫罪。今次盧Sir再度出擊,以撞擊點理論為含寃受屈的司機翻案。

蘋果日報 12月9日報導:

警草率查車禍 再造寃案
理大工程師撞擊點理論助翻案

【本報訊】鄧先生早前駕車載妻女回家,在西貢公路與小巴迎頭猛撞,全家受傷。鄧先生堅稱是小巴越線釀禍,警方竟憑撞車後碎片在小巴一旁等理由,斷定鄧是禍首而提控。受害人變被告,鄧含寃受屈,太太更困擾至幾乎精神崩潰,最終幸得到理大工程師盧覺強助洗脫寃名。法官批評警方判斷草率,證供毫無說服力。
記者:邱錦綉 廖韻思 黃江奇

今年 2月 26日下午 3時,鄧駕車載同妻女駛經西貢公路菠蘿輋對開時,對面線一公共小巴落客後抽頭越過雙白線,車頭打斜衝來,私家車被撞至打轉掉頭停下,鄧家三口及小巴司機均告受傷。當時鄧一邊車門無法打開,女兒大叫:「媽媽好痛呀!」太太亦告受傷,痛至動彈不得,幸有好心路人將女兒抱出車外,並安慰說︰「係個小巴司機唔啱!」

事發後消防先到場,將撞車後散落一地的碎片撥向小巴旁,以便重開一條行車線。鄧太憶述他們上了白車後,一警員走來查問,「佢個樣好惡,好似當我哋係犯咁。我同佢講俾小巴撞,佢竟然話『嗰度巴士都過到,係你雙白線抽出嚟爬頭撞人咋』!」鄧先生形容警員像判官上身,但他當時只記掛女兒和太太傷勢,沒拍下照片或尋目擊途人做證。

鄧事後穿了肺,妻子胸骨撞裂, 4歲女兒則受皮外傷。一家遭逢車禍本是受害人,但諷刺是警方竟控告鄧危險駕駛引致他人受傷。「警方話啲碎片喺小巴嗰邊,所以有理由相信係我撞過去。我覺得真係好寃枉,點解可以咁屈人!」鄧說小巴司機找來兩乘客和一私家車司機做證,警方亦有專家證人,自己孤立無援。

「被屈危駕隨時坐監,好彩有理大機械工程系工程師盧覺強義務幫我哋,仲同我哋一齊去現場搵目擊證人,睇吓有冇人影咗相,又幫我哋驗車搵證據,係我哋救命恩人。」鄧太說當時致電理大找盧協助,盧答應幫他們時,自己哭得死去活來。

「嗰段時間真係好慘,晚晚發噩夢瞓唔着,見到小巴就驚到成身震,壓力搞到係咁甩頭髮,瘦咗廿幾磅。」她說車禍加上官司,令她幾乎精神崩潰,現要服藥及睇心理醫生,還要看脊醫、腸胃科及皮膚科醫生。

控方完全無法反駁

「我做投資銀行,食咗藥後個人反應好慢,工作表現大不如前。」鄧太憶述時雙眼通紅,幸終沉寃得雪。上月 17日案件在九龍城裁判法院開審,法官羅德泉裁定鄧無罪,更批評警方判斷草率,提供的證據「普通加普通」,相反盧覺強提供的撞擊點理論有數據支持,控方完全無法反駁。

「我哋唔會再主動追討賠償,因為已經好累,還我哋清白就得。」鄧先生說希望警方日後能認真處理每宗交通事故,別讓小市民白白含寃。

夫穿肺妻骨裂竟驗唔出

【本報訊】鄧氏夫婦車禍後送往將軍澳醫院診治,醫院檢查後說他們無大礙,叫他們即晚出院。出院後,鄧先生不斷乾咳,太太胸口仍感劇痛,捱了兩日後,決定再找私家醫生診治。

要即做手術否則無命
鄧太說:「本來以為係啲骨有事,所以去聖德肋撒醫院睇骨科,醫生睇完我哋兩個張 X光片,話我胸骨裂咗,要慢慢休養;之後望住我老公張 X光片,話點解個肺得番個拳頭咁大嘅,即時轉介胸肺科。」原來鄧先生的肺被撞穿,要即時做手術,稍有延誤隨時無命。

「穿肺喎!將軍澳醫院點會完全檢查唔出;如果我哋冇搵私家醫生診治,我身邊人係咪仲喺度呢?我真係唔敢想像。」鄧太常有聽聞公立醫院醫療失誤,沒想到自己會變主角。由於私家醫院收費昂貴,他們被迫到將軍澳醫院覆診。該院亦「知錯」,特別厚待他們,故無再追究。

政府化驗專家「真化學」
「警方咁草率,可能造成好多寃案!」被喻為真人版 Professor King(電視劇《談情說案》主角),理大機械工程學系工程師盧覺強早前再出庭為交通意外被告作專家證人,終為一家三口沉寃得雪。

該宗意外令鄧先生被控不小心駕駛,控方更指證他事發時越過雙白線引致車禍,「警方專家證人話啲碎片喺晒小巴嗰邊,仲有四個證人做證,表面證供鄧生輸晒。」盧覺強力撐鄧生,更於上月 18日出庭時帶同道具即場示範了令人信服的實驗,為被告找出真相,就連庭警也踏前觀看。盧說:「碎片係可以移動嘅,但架車嘅『傷勢』無得假!」

越線相撞 難彈到避車處
在實驗中,盧利用一遙控模型車,設定跟私家車被撞後右前轆嚴重損毀被鎖住、失去動力,其餘三轆則續轉動時,私家車果然順時針 180度打「白鴿轉」,車頭呈反方向。實驗反映出當時情況,私家車打轉後反方向停在避車處,地上沒有胎痕。相反,若根據控方指控,私家車是越線直行導致兩車相撞,雙方撞擊力達 4.6噸,私家車會反彈到原本行車線上,根本沒可能彈到避車處:「啲碎片係消防踢過去小巴那邊,警方就咁草率判斷私家車越線,太唔專業。」

盧覺強說,當時出庭作證的政府化驗師,履歷顯示是讀化學出身。他認為警方應找機械工程專家,為每宗案件分析,而非政府化驗專家作證:「佢哋讀化學,根本唔係專科,點做專家證人呀!」

《蘋果》記者

原文:

警草率查車禍 再造寃案 理大工程師撞擊點理論助翻案

夫穿肺妻骨裂竟驗唔出

政府化驗專家「真化學」